Prins Wim I (2020)

-Erfprins vaan ’t Kèrkhof en de Vossekojl in Eigenbilze
-Graof vaan de Van Aokeweeg op Aajd Caberg
-Oonder-’Emir’ vaan de vleegmachienes op vleegveld Beek
-Commandant vaan ‘t Blouwe Tamboerkorps
-Veurmaan vaan alle toesklussers
-Honorair ambassadeur van de boond vaan Globetrotters
-Veurtrekker vaan de gezameleke blouwgreun hoeshajdbeukskes

Gebore bin iech 34 jaor geleie in Eigenbilze in Belsj, boe iech bei de nonne op sjaol höb gezete. Nao ’n Belsje muzikaal opvoeding bin iech mèt mien broor Jan en later pap Bèr bijnao 25 jaor geleie bei de Blouwe terech gekaome, umtot pap ziene ampa vreuger in ’t bestuur heet gezete. Iech späöl melodisch slaagwèrk en op straot de klein trom. Mien opleiing höb iech in Bilzen en Hasselt gehad en iech werk al ‘ne ganse tied op ’t vleegveld. Nao Bedriefsmanagement te höbbe gedoon zit iech noe bij Emirates oet ’t Ooste.

Iech haw vaan de Vastelaovend en Wolder en bin ouch mier daan 11 jaor lid gewees vaan CV De Blouwe. Zoe bin iech ouch mien prinses Marcella tegegekaome, op bezeuk bei CV De Greune, boe häöre pap nog prins waor!

Veur eederein dee zich aofvreug: ‘Blouw en Greun same, dao kreigste get vaan!’, zègke veer: Wat kreigste…Daan! Daan is eus heerlek menneke vaan ’n jaor aajd. Veer woene mèt eus dreie in de sjieke Van Aokeweeg op Aajd Caberg.

‘Ne groete wins vaan miech weurt vendaog woer: iech maag uuch veurgoon es 64e prins vaan CV De Blouwe.

Heibij belaof iech uuch bij de grasie vaan De Blouwe um ‘ne gruutse prins te zien.
Iech belaof wijer tot:
-iech mien Marcella vaan Weert tot Wolder zal verwene es ’n echte prinses;

-iech miene zoon Daan zal aonsteke mèt het Wolders vastelaovendsvirus;
-iech vaanaof noe alle planninge euverboord goej veur de callepin vaan De Blouwe;
-iech miech bei de Greune net zoe zal gedrage es bij de Blouwe, wat dat ouch maag inhawwe;
-iech de Raod vaan Elf zal veurgoon bij ‘t oetdrinke vaan alle pöt beer of aander hiemels voch;
-iech alle Woldernere en neet Woldernere zal veurgoon in dees Wolderse vastelaovend, al kos miech dat miene allerlèste dröppel Blouw blood
Sjöt in, Sjöt in, Sjöt in!

Veurgeleze op 1 fibberwarie in ‘t jaor 2020
In de Blouwe Hoftempel vaan ‘t dörp Wolder
In de groete stad Mestreech