Prins Luc I (2019)

-Erfprins vaan ’t paad vaan Paoter Kuster in Beek
-Graof vaan de Riekhovestraot op de Haozedans
-Ierste lierlingpromoteur vaan Thomas vaan de Regout
-Slaagmeister vaan ‘t Blouwe Tamboerkorps
-Honorair ambasadeur vaan de wintersport
-Iereveurzitter van Motorclub Zaotsedaoraon

-Oppersjöddeleer vaan alle Gin-Tonic drenkskes

Gebore bin iech bekans 2×11 jaor geleie in Beek, mèr iech bin opgegreujd op de Haozedans boe iech mien ierste zandkojle höb gegraove. De sjaole vaan John F. Kennedy en Bonnefante höbbe miech gebrach tot de Hoegesjaol in Zitterd. Noe lier iech mien vak bij Thomas Regout in de Bosserveld.
Iech bin al sinds 2005 aon t trommele bei de Blouwe, sjus wie miene pa Theo. Heer waor mam hei tege t lief gelaope toen zie nog e mazjoretsje waor. Noe späölt zie trompöt. Mien zöster Susan späölt ouch gere bei de hermenie op häör klarinetsje

Oondaanks tot iech vreuger väöl op vekansie waor in de snie, bin iech de lèste jaore allein nog veur de vastelaovend gevalle. Op stap goon en Netflixe daon iech gere en aofelaope jaor bin iech mien vriendin Maartje tegegekaome.

‘Ne groete wins vaan miech weurt vendaog woer: 11 jaor naotot miene pap prins waor maag iech uuch veurgoon es 63e prins vaan CV De Blouwe.

Heibij belaof iech uuch bij de grasie vaan De Blouwe um ‘ne gruutse prins te zien.
Iech belaof wijer tot:
-iech mien Maartje zal verwene es ’n echte prinses;
-iech mien zöster Susan verpliech um gein Bali(e)werk mie te doen;
-iech vaanaof noe mien motorpak zal inruile veur de prinseleke slippejas;
-iech mien awwers zal hèlpe mèt alle confetti op te ruime es de carnevalswage weer veur us hoes steit;
-iech de Raod vaan Elf zal veurgoon bij ‘t oetdrinke vaan alle pöt beer of aander hiemels voch;
-iech alle Woldernere en neet Woldernere zal veurgoon in dees Wolderse vastelaovend, al kos miech dat miene allerlèste dröppel Blouw blood
Sjöt in, Sjöt in, Sjöt in!

Veurgeleze op 9 fibberwarie in ‘t jaor 2019
In de Blouwe Hoftempel vaan ‘t dörp Wolder
In de groete stad Mestreech