Prins Leon I (2012)

Erfprins vaan de Breusselseweeg en umgeving
Graof vaan de Pletzersstraot
Oppercoureur vaan de Bejaordetehoeser in Mestreech en umstreke
Iereveurzitter vaan de Blouwe Drappodivisie
Honorair ambassadeur vaan de Duitse vekansiebond
Emeritus ierelid vaan De Leevemeekers
Groet-Protecteur d’Orange vaan de Wolderse Vastelaovendscortège

Gebore bin iech op Kaberg, boe iech es koejong op de Breusselseweeg höb gespäöld. Toen iech es jonge knappe vent dat Blouw mazjoretsje van Bastiaens waor tegegekaome in Wolder, waor iech verkoch. Met mien Karin woen iech noe alweer 30 jaor in het mies oétstekende hoes in de Pletzersstraot, same met eus twie döchter.
Mien wèrk begos op de Zakkefebrik in Mestreech. Tegeswoordig sjäör iech al hiel gèt jaor roond veur de minder mobiele luikes.
Iech bin ruim 25 jaor lid vaan de Veendelaofdeiling vaan de hermenie en iech höb ouch euze twie döchter Cindy en Chiara ‘Blouw’ groetgebrach.Ouch die waore lid gewore beij de mazjorette  en daormèt zien veer un echte ‘Blouw’ femilie. Neve de vastelaovend maake veer geere de pruuse buurte onveilig es veer op vekansie goon.
‘Ne groete weens vaan mieuch weurt vendaog woer, iech maag uuch veurgoon es 56e prins vaan CV De Blouwe.

Heijbeij belaof iech uuch beij de grasie vaan De Blouwe um ‘ne gruutse prins te zien.
Iech belaof weijer tot:
-iech mien Karin vaanaof noe zal verwene es ’n ech prinseske
-ouch mien döchter die prinsessebehandeling zalle kriege
-iech de scepter vaan de Blouwe altied in ein vaan mien twie linkerhan zal hawwe
-iech mèt de vastelaovend neet mie zelf gaon vare, mèr miech toes laot bringe
-iech beij het leeg rake vaan de tank vaan de prinseleke wagel neet mie de verkierde benzine drin daon
-es iech toch de verkierde benzine tank, iech zelf de wagel naor hoes zal duije
-iech het oranje hesje vaan de Optochkemissie noe verruil door de prinseleke slippejas
-iech neet naor mien brak zal trök goon veur tot iech alle kaffee’s vaan Wolder achterein höb gezat.
-iech de Raod vaan Elf daorbeij zal veurgoon beij ‘t oetdrinke vaan alle pöt beer of aander hiemels voch.
-iech alle Woldernere en neet Woldernere zal veurgoon in dees Wolderse vastelaovend
al kos miech dat miene aller letste dröppel Blouw blood.

Sjöt in, Sjöt in, Sjöt in!

Veurgeleze op 28 Jannewarie in ‘t jaor 2012
In de Blouwe Hoftempel van mien dörp Wolder
In de groete stad Mestreech