CV De Blouwe 6x 11 Jaor in coronatied

CV De Blouwe 6x 11 Jaor in coronatied

CV De Blouwe – Wolder heet dit jaor ‘n zjubilei vaan ‘t 6x 11 jaoreg bestaon. Veer höbbe lang gewach of veer dit jaor een weerdeg vastelaovendsprogram koste prizzentere, mèr dat geit helaas neet lökke mèt de maotregele vaan de euverheid in verband met corona.

Veer höbbe daorum beslote um ouch dit jaor geine prins oet te rope en dr zal ouch gein Vastelaovendskonzèr plaotsvinde vaan eus Hermenie Wilhelmina Wolder. Prins Wim I zal zien regeerperiode nog ‘ne kier mèt n tiedsje verlenge.

Veer hawwe wel alle oontwikkelinge in de gate en veer zalle kieke, es t ouch mèr eve kin binne de maotregele, of veer riechting of mèt Vastelaovend toch nog gèt kinne organisere veur de vereiniging en veur de gemeinsjap vaan Wolder. Dit alles in samespraak mèt de ander vereineginge in Wolder en Belsj en mèt de gemeinte.

Ouch kieke veer nog of veer op ’n later tiedstip, dit jaor, of anders begin volgend jaor stèl kinne stoon bei dit zjubilei en daan hopelek ouch ‘ne nuie Hoeglöstegheid kinne oetrope, dee in ‘ne echte oonvervalste Wolderse Vastelaovend maag veurgoon!

Veer kaome daor hopelek zoe snel meugelijk bei uuch op trök!

Blief gezoond en Haw Pin!

CV De Blouwe

Jannewarie 2000 + 2×11

n Stökske Historie

Dit jaor is het 66 jaor geleie tot Hermenie Wilhelmina Wolder, “De Blouwe” een eige carnavalsvereineging had opgeriech, in het jaor 1956. Bij de iersvolgende vastelaovend waor Leo I (Ketelslegers) de ierste Prins vaan CV De Blouwe. Daornao volgde eeder jaor ‘ne nuie prins.

Prinse-Unicum (of neet?)

Tot noe daan, zow eederein mesjiens zegke. De lui vaan de Blouwe wete echter wel beter…

Oet de Zjubileiumgids vaan 5×11 jaor CV De Blouwe (2011)

“ ….Veer höbbe auch unne prins gehad dee twie jaor heet geregeerd. In 1982 en 1983 euse prins Jan
Darding. Dat kaom door dat euse zaol nog neet veerdig waors, en veer genne aandere zaol kòste kriege um unne nuije prins oet te rope. Mè de organisasie zaot dao toch met op hunne maog. Zie vroge ziech aof, zouw dat toch neet te deur weure veer deen erreme jong? Mè iech kin uuch gerös stelle. Heer heer miech ins in mien oer gefluusterd:
“Jè en toch is ut neet zoe deur twie jaor achterein prins te zien ‘s maondags komme ze dig aofhole mèt un ganse kompeneij en dat is gezellig. En de höbs daan get beer en bruutsjes in hoes gehaold. En es ze denao goon en der is get euver gebleve, dat kinste weggoeie um totste de rest vaan die daog toch neet mie thoes kums.

Mè noe höb iech miech dat bewaord veur ut jaor drop!” ….”

(Anekdote opgesjreve door Coen van Thor)

En noe daan?

Mèt Prins Wim I is dr (helaas) noe wel ’n unicum: neet umtot vr geine zaol höbbe, mèr geine (fetsoenleke) vastelaovend al twie jaor. Heer zal dus nog eve ziene scepter en steek bewaore, zoetot heer häöm nao hopelek uuterlek drei (!) jaor kin euverdrage. Aon Wim, zien Marcella en de kinder: merci alvas daorveur!

Reakties plaotse is geslote.